موسوعه من اشعار الشاعر الاماراتي جمعه بن نايم الكعبي..~

محتاج لك

أنا بأمس الحاجة لك ... لا تبتعد محتاج لك

كلي وله مشتاق لك ... أرجوك لا تبعد بعيد

تعال يا عمـــر الهنا ... أنا بــدونك من أنا؟

قلبي شقا وعمري عنا ... والشوق في قلبي يزيد

أصارع أيام الزمان ... ما صار في الدنيا أمان

خليك في هذا المكان ... أحس من دونك وحيد

أتخيلك دومك معاي ... قمرا تنور لي سماي

أفرح وأجدد بك هواي ... وأحيا الأمل بك من جديد

يا راحة البال وغلاك ... ما حب في الدنيا سواك

أنا معك وأبقى معاك ... حتى لو تبعد بعيد


....................


الحب المثالي
كيف أسمي حبك الحب المثالي .... كيف أمنّك الهوى وأنته عدوه

كيف أحبك كيف أقول اليوم غالي .... وأنت مثل اللي دخل في الحب توه

روح يا مغرور عنك القلب سالي .... والذي يرضيك في دنياك سوه

عنك أنا ذا اليوم انويت ارتحالي .... وأمسح الذكرى من الأشواق قوه

لك أمل ماهو وعد بس احتمالي .... عقب حبك ما دخلت الحب ضوه

وإن دخلت الحب أعطي كل حالي .. وافيٍ والنفس للمقبل صفوه




.....................

يا ورد
يا ورد وش يقرب لك الخد؟ ... لي صاحبه يقطفك بيديه

شد إنتباهي في الشبه شد ... يا ورد شاللي منك تعطيه؟

يا ورد .. له عين وله قد ... وله طول مع خصر يحليه

له بسمه ما هي على حد ... ودي عيــوني ما تخليه

من خاطري قمــت آتنهد ... حسيت روحي ميته فيه

ما هو مزوحي نظرته جد ... وفي مشيته يوزن خطاويه

سلمت لا سلم ولا رد ... روح وعـــين الله تراعيه

ناظر بطرف عيونه وصد ... وكلي أمل يوم ألاقيه


....................


نظرة عيونك
جيت أداوم نظرة اعيونك .... ما حسبت أن الثمن غالي

واقصرت الأنظار من دونك .... شفت ف عيونك شقا حالي

من سنة نور القمر لونك .... وتزدهي بك حبة الخالي

تمشي وتقبــل يحيــونك .... بين كــل الخـــود تختالي

يا بخت من هم يشوفونك .... قربهم في الدار نزّالي

وإن ضوى الداجي يمسونك .... وتبتسم يا طيب الفالي

إن زقرت الناس في عونك .... كلهم في أول وتالي

وروف بي خذني على هونك .... الهوى متلف وقتالي

لا تعذب روح مضنونك .... خلني عايش وأنا سالي

سلَّم اعيوني من اعيونك .... الثمن يا صاحبي غالي


...................

رساله
إلى حضرت جناب اللي نسانا .... تحية طيبة لك من جدانا

رسلنالك سلامــات كثيرة .... ولا رديت بأقـــوال وبــيانا

عساك بخير يا أعز الحبايب .... عسى باقي مع الذكرى غلانا

وش اللي غيرك فجأه علينا .... كلام الناس ماهو من خطانا

إذا غروك بالقول العواذل .... نحن وش ذنبنا هذا جزانا

على فكرة ترانا ما نسينا .... ولكن بالصبر نملك هوانا

إذا قصدك تذللنا بودادك .... تأكد ما خضعنالك ترانا

نجازي بالمثل منهو يجازي .... ونعطي حبنا منهو عطانا

تذكر هالرساله في غيابك .... مسير الوقت يتعبك بشقانا

ولو ما شفتنا لابد تذكر .... ودمعك يشهد بسالف لقانا


...................

راح تعرف
راح تعرف أن حبي مع مرور الوقت صايب ... راح تعرف في النهاية ما حد يعوض مكاني

راح يكشف لك زمانك من هو اللي كان طايب ... ومن هو اللي لجل خله عاند ضروف الزماني

هذي الدنيا غــربيه .. صعب تلقى لك حبايب ... قلتها لك مالبداية صعــب يوفي لك أناني

من يضيع وقت غيره ولا يضحي في الصعايب ... كيف يثبت لك وجوده كيف تعطيه الأماني ؟

إختلاف الرأي يحصل كل شي وله سبايب ... والمحبة درب واضح من عشق لازم يعاني

وطبعها لحباب تبقى عالوفا وقت النوايب ... والمحب يصون خله ما رضى فيه الهواني

شفت عشرة غرامك يا هوى غيري عجايب ... تنفعل لحظة وجودي وتغير في ثواني

إنت في طبعك مزاجي تعصف بقلبك هبايب ... منشغل قصدك تلاقي من هو يعوض مكاني


....................



يا بوي
يابوي أنا أسهر والملا رقود .... يابوي أنا عفت المنامي

يابوي أنا لي قلب مصيود .... مصطاب من حلو القوامي

يابوي أنا أشكي ناعم العود .... ياللي عليه القلب ضامي

لا تلومني يابـــوي بالـــزود .... أنا المتيم بالغـــرامي

لو دون وصله دار وحسود .... ما همني كثر الكلامي

بيني وبينه لـــزم وعهود .... اموثقه له باحـــترامي

يابوي أحبه حــب مفنود .... واللي شراتي ما يلامي

في الروح حبه دوم موجود .... يابوي هايم به هيامي

هو غايتي وهو كل مقصود .... وأحن له حن الضوامي

عساه في راحات وسعود .... وعساه غي خير وسلامي

..........................